შპს „ეკომის“ სამართალდამრღვევად ცნობისა და ადმინისტრაციული პასუხისმგებლობისაგან გათავისუფლების თაობაზე

შპს „ეკომის“  სამართალდამრღვევად ცნობისა  და ადმინისტრაციული პასუხისმგებლობისაგან გათავისუფლების თაობაზე

I.  აღწერილობითი ნაწილი

საქართველოს კომუნიკაციების ეროვნული კომისიის (შემდგომში „კომისია“) აპარატის აუდიო-ვიზუალური მედია მომსახურების რეგულირების დეპარტამენტის სამსახურებრივი ბარათის (N 20-10-1917; 21/09/2020)  საფუძველზე, „საქართველოს კომუნიკაციების ეროვნული კომისიის საქმიანობის მარეგულირებელი წესების“ 36-ე მუხლის  მე-14  პუნქტის შესაბამისად, კომისიაში  დაიწყო  მარტივი  ადმინისტრაციული წარმოება შპს „ეკომისათვის“ ადმინისტრაციული პასუხისმგებლობის დაკისრების თაობაზე, მის მიერ „მაუწყებლობის შესახებ“ საქართვლოს კანონის 451 მუხლის მე-10 პუნქტის   „ა“ და „დ“ ქვეპუნქტებისა და „საქართველოს კომუნიკაციების ეროვნული კომისიის 2011 წლის N144/22 გადაწყვეტილების ნაწილობრივ ძალადაკარგულად ცნობისა და სტატისტიკური ანგარიშგების ფორმების დამტკიცების შესახებ“ კომისიის 2016 წლის 11 თებერვლის N95/19 გადაწყვეტილების (ფორმა 4.15 სამაუწყებლო ბადე) დარღვევის გამო.

კომისიის აპარატის აუდიო-ვიზუალური მედია მომსახურებების რეგულირების დეპარტამენტის   სამსახურებრივ   ბარათში   (N   20-10-1917;   21/09/2020)   აღნიშნულია, რომ დეპარტამენტის   მიერ  სამაუწყებლო   ბადის   წარმოდგენასთან   დაკავშირებული პერიოდული მონიტორინგის განხორციელებისას შემოწმდა შპს „ეკომის“ მიერ სამაუწყებლო ბადის წარმოდგენა, რის შედეგადაც აღმოჩნდა, რომ მაუწყებელს კომისიის ელექტრონული პორტალის საშუალებით ბოლო 4 თვის განმავლობაში სამაუწყებლო ბადე არ წარმოუდგენია.

2020 წლის 31 აგვისტოს კომისიამ წერილით (კომისიაში რეგისტრაციიის N გ-20-04/2740) მიმართა შპს „ეკომს“ და „მაუწყებლობის შესახებ“ საქართველოს კანონის 45–ე პრიმა მუხლის მე-10 პუნქტის „დ“ ქვეპუნქტის შესაბამისად, რომლის თანახმადაც, მაუწყებლობის სფეროში ავტორიზებული პირი ვალდებულია ყოველკვირეულად გამოაქვეყნოს და კომისიას მიაწოდოს მომდევნო კვირის პროგრამების განრიგი, პროგრამების დასახელებისა და მოკლე ანოტაციის მითითებით, მოსთხოვა სამაუწყებლო ბადის 5 სამუშაო დღის ვადაში წარმოდგენა. კომისიის მოთხოვნას მაუწყებლის მხრიდან რეაგირება არ მოჰყოლია.

მიმდინარე ადმინისტრაციული წარმოების ფარგლებში, დამატებითი ინფორმაციის სახით, წარმოდგენილ იქნა კომისიის აპარატის აუდიო-ვიზუალური მედია მომსახურებების რეგულირების  დეპარტამენტის დამატებითი  სამსახურებრივი  ბარათი  (N  20-10-1975;23/09/2020). სამსახურებრივი ბარათის მიხედვით, კომისიის მიერ წერილის გაგზავნის შემდეგ, შპს „ეკომმა“ ელექტრონული პორტალის საშუალებით წარმოადგინა 8 და 9 სექტემბრის სატელევიზიო პროგრამა. თუმცა, 9 სექტემბრის შემდეგ მაუწყებელს ყოველკვირეული ვალდებულების შესრულება, როგორც ეს კომისიის წერილით იყო მოთხოვნილი, არ გაუგრძელებია. სამაუწყებლო პროგრამის ერთჯერადად წარმოდგენის მიუხედავად, შპს „ეკომს“ მიმდინარე წლის განმავლობაში, 8 სექტემბრამდე და 9 სექტემბრის შემდეგ, კომისიისათვის მოწოდებული არ ჰქონდა ინფორმაცია, რისი ვალდებულებაც მას „მაუწყებლობის შესახებ“ საქართველოს კანონით ეკისრება.

ზემოაღნიშნულიდან გამომდინარე, კომისიის აპარატის აუდიო-ვიზუალური მედია მომსახურების რეგულირების დეპარტამენტს მიაჩნია, რომ შპს „ეკომის“ მხრიდან ადგილი აქვს კანონმდებლობით დადგენილი ვალდებულების შეუსრულებლობას.

კომისია აღნიშნავს, რომ შპს „ეკომისათვის“ ადმინისტრაციული პასუხისმგებლობის დაკისრების თაობაზე საკითხის განხილვა დაინიშნა 2020 წლის პირველ ოქტომბერს, 15:00 საათზე, რის შესახებაც შპს „ეკომს“ ეცნობა შეტყობინებით. ამავე შეტყობინებით, კომპანიას განემარტა საქართველოს ზოგადი ადმინისტრაციული კოდექსის 98-ე და 99-ე მუხლებით გათვალისწინებული მტკიცებულებებისა და შუამდგომლობების წარმოდგენის, ადმინისტრაციულ წარმოებაში არსებული დოკუმენტებისა და სხვა მასალების გაცნობის უფლება.

კომისიის 2020 წლის პირველი ოქტომბრის სხდომას არ ესწრებოდა შპს „ეკომის“ წარმომადგენელი. შეტყობინების მხარისათვის გაგზავნითა და ასევე კომისიის ვებ- გვერდზე საჯაროდ გამოქვეყნებით კომისიამ უზრუნველყო საქართველოს ზოგადი ადმინისტრაციული კოდექსის 95-ე მუხლის მოთხოვნა დაინტერესებული მხარის ადმინისტრაციულ წარმოებაში ჩაბმასთან დაკავშირებით. აქედან გამომდინარე, კომისია უფლებამოსილია განიხილოს საკითხი შპს „ეკომის“ წარმომადგენლის დაუსწრებლად.

II. გამოკვლეული მტკიცებულებები

1. კომისიის    აპარატის    აუდიო-ვიზუალური    მედია    მომსახურებების  რეგულირების დეპარტამენტის სამსახურებრივი ბარათი (N 20-10-1917; 21/09/2020).

2. შპს „ეკომისათვის“ გაგზავნილი კომისიის წერილი (N გ-20-04/2740; 31/08/2020).

3. კომისიის    აპარატის    აუდიო-ვიზუალური    მედია  მომსახურებების რეგულირების დეპარტამენტის სამსახურებრივი ბარათი (N 20-10-1975; 23/09/2020).

4.  მეწარმეთა და არასამეწარმეო (არაკომერციული) იურიდიული პირების რეესტრიდან და კომისიის  ავტორიზებულ   პირთა   უწყებრივი   რეესტრიდან   შპს   „ეკომის“   შესახებ მონაცემები.

5. შპს„ეკომისათვის“ გაგზავნილი შეტყობინება კომისიის 2020 წლის პირველი ოქტომბრის სხდომაზე მოწვევის თაობაზე.

III. დადგენილი  ფაქტობრივი გარემოებები

1.   შპს „ეკომი“ წარმოადგენს მაუწყებლობის სფეროში ავტორიზებულ პირს.

2. შპს „ეკომს“ ბოლო 4 თვის განმავლობაში კომისიის ელექტრონული პორტალის საშუალებით,  სამაუწყებლო ბადე არ წარმოუდგენია.

3.  შპს „ეკომმა“ ელექტრონული პორტალის საშუალებით წარმოადგინა 2020 წლის 8 და 9 სექტემბრის სატელევიზიო პროგრამა. თუმცა, 9 სექტემბრის შემდეგ მაუწყებელს ყოველკვირეული ვალდებულების შესრულება, რაც გათვალისწინებულია „მაუწყებლობის შესახებ“ საქართველოს კანონით არ განუხორციელებია.

4. შპს „ეკომმა“ გადაწყვეტილების მიღების მომენტისათვის, კომისიის ელექტრონული პორტალის საშუალებით, კომისიაში წარმოადგინა სამაუწყებლო ბადე, რითაც აღმოფხვრა არსებული დარღვევა.

5.  შპს „ეკომის“ მიმართ ბოლო ერთი წლის განმავლობაში იგივე/მსგავსი დარღვევისათვის „მაუწყებლობის შესახებ“ საქართველოს კანონით გათვალისწინებული პასუხისმგებლობის არცერთი სახე გამოყენებული არ ყოფილა.

IV. გადაწყვეტილების მიღების სამართლებრივი საფუძვლები და დასაბუთება

1. ,,მაუწყებლობის შესახებ” საქართველოს კანონის მე-3 მუხლის პირველი პუნქტის შესაბამისად, მაუწყებლობის სფეროში კანონმდებლობას  შეადგენს  საქართველოს კონსტიტუცია, საქართველოს საერთაშორისო ხელშეკრულებები,     საქართველოს ორგანული  კანონი  „საქართველოს   საარჩევნო   კოდექსი“,   ეს   კანონი,   „ეროვნული მარეგულირებელი ორგანოების შესახებ“ და „საავტორო და მომიჯნავე უფლებების შესახებ“ საქართველოს კანონები, სხვა საკანონმდებლო და კანონქვემდებარე ნორმატიული აქტები.

2.   ,,მაუწყებლობის   შესახებ“   საქართველოს   კანონის   მე–5   მუხლის   მე–3  პუნქტის „ვ“ ქვეპუნქტის შესაბამისად,   კომისიის  ფუნქციასა   და   ვალდებულებას   წარმოადგენს მაუწყებლის მიერ მაუწყებლობის სფეროში მოქმედი კანონმდებლობის მოთხოვნების შესრულებაზე ზედამხედველობა და კონტროლი და ამ მოთხოვნათა დარღვევის შემთხვევაში მისთვის შესაბამისი სანქციების დაკისრება.

3. „მაუწყებლობის შესახებ“ საქართველოს კანონის 451 მუხლის მე-10 პუნქტის „ა“ ქვეპუნქტის თანახმად, ავტორიზებული   პირი   ვალდებულია  დაიცვას   მაუწყებლობის   სფეროში მოქმედი კანონმდებლობა, მათ შორის, კომისიის დადგენილებები და გადაწყვეტილებები; მაუწყებლობის სფეროში მოქმედ კანონმდებლობაში ცვლილებების შეტანის შემთხვევაში უზრუნველყოს ავტორიზებული საქმიანობის მათთან შესაბამისობა.

4.   „მაუწყებლობის   შესახებ“   საქართველოს   კანონის   451 მუხლის  მე-10   პუნქტის   „დ“ ქვეპუნქტის თანახმად, ავტორიზებული პირი  ვალდებულია   ყოველკვირეულად გამოაქვეყნოს  და   კომისიას  მიაწოდოს  მომდევნო კვირის  პროგრამების განრიგი პროგრამების დასახელებისა და მოკლე ანოტაციის მითითებით.

კომისიას მიაჩნია, რომ შპს „ეკომის“ მიერ კომისიის ელექტრონული პორტალის საშუალებით ბოლო 4 თვის განმავლობაში სამაუწყებლო ბადის წარმოუდგენლობით და მხოლოდ 8 და 9 სექტემბრის სატელევიზიო პროგრამების წარმოდგენით, რაც გულისხმობს კანონისმიერი ვალდებულების არაჯეროვან შესრულებას, დარღვეულია „საქართველოს კომუნიკაციების ეროვნული კომისიის 2011 წლის N144/22 გადაწყვეტილების ნაწილობრივ ძალადაკარგულად ცნობისა და სტატისტიკური ანგარიშგების ფორმების დამტკიცების შესახებ“ კომისიის 2016 წლის 11 თებერვლის N95/19 გადაწყვეტილება (ფორმა 4.15 სამაუწყებლო ბადე) და „მაუწყებლობის შესახებ“ საქართველოს კანონის 451 მუხლის მე-10 პუნქტის „ა“    და „დ“ ქვეპუნქტები, რომლის მიხედვითაც, ავტორიზებული პირი ვალდებულია დაიცვას მაუწყებლობის სფეროში მოქმედი კანონმდებლობა, მათ შორის, კომისიის დადგენილებები და გადაწყვეტილებები და ყოველკვირეულად გამოაქვეყნოს და კომისიას მიაწოდოს მომდევნო კვირის პროგრამების განრიგი, პროგრამების დასახელებისა და მოკლე ანოტაციის მითითებით, რომელიც ივსება ყოველკვირეულად, ყოველი კვირის კვირა დღის ბოლომდე და წარმოდგენილი უნდა იქნეს შემდეგი კვირის 7 დღის სამაუწყებლო    ბადე.    შესაბამისად,    ზემოაღნიშნული    დარღვევა წარმოადგენს „მაუწყებლობის შესახებ“ საქართველოს კანონის 71-ე მუხლით გათვალისწინებული პასუხისმგებლობის დაკისრების საფუძველს.

კომისია ასევე აღნიშნავს, რომ შპს „ეკომის“ მიმართ  ბოლო ერთი წლის განმავლობაში „მაუწყებლობის შესახებ“ საქართველოს კანონით გათვალისწინებული იგივე/მსგავსი ხასიათის დარღვევისათვის პასუხისმგებლობის არც ერთი სახე გამოყენებული არ ყოფილა. ამასთან, ვინაიდან შპს „ეკომის“ მიერ გადაწყვეტილების მიღების მომენტისათვის, კომისიის ელექტრონული პორტალის საშუალებით, კომისიაში კომპანიის მიერ წარმოდგენილ იქნა სამაუწყებლო ბადე და კომპანიის მიერ აღმოფხვრილი იქნა დარღვევა, კომისია უფლებამოსილია სცნოს კომპანია სამართალდამრღვევად და გაათავისუფლოს ადმინისტრაციული პასუხისმგებლობისაგან.

V. სარეზოლუციო ნაწილი

ზემოაღნიშნულიდან გამომდინარე, „მაუწყებლობის შესახებ“ საქართველოს კანონის მე-3 მუხლის პირველი პუნქტის,  მე-5 მუხლის მე-3 პუნქტის  „ვ“ ქვეპუნქტის,  451 მუხლის მე-10   პუნქტის „ა“ და   „დ“   ქვეპუნქტებისა  და   71-ე   მუხლის,    საქართველოს   ზოგადი ადმინისტრაციული   კოდექსის   95-ე   98-ე   და   99-ე   მუხლებისა   და   „საქართველოს კომუნიკაციების   ეროვნული   კომისიის   საქმიანობის   მარეგულირებელი  წესების“ 36-ე მუხლის მე-13 და მე-14 პუნქტებისა და კომისიის 2011 წლის N144/22 გადაწყვეტილების ნაწილობრივ ძალადაკარგულად ცნობისა და სტატისტიკური ანგარიშგების ფორმების დამტკიცების შესახებ“ კომისიის 2016 წლის 11 თებერვლის N95/19 გადაწყვეტილების (ფორმა 4.15 სამაუწყებლო ბადე) შესაბამისად, კომისიამ, კენჭისყრის შედეგად ერთხმად,

გადაწყვიტა:

1. ცნობილ იქნას შპს „ეკომი“ სამართალდამრღვევად „მაუწყებლობის შესახებ“ საქართველოს კანონის 451 მუხლის მე-10 პუნქტის „ა“ და „დ“ ქვეპუნქტებისა და კომისიის 2011 წლის N144/22 გადაწყვეტილების ნაწილობრივ ძალადაკარგულად ცნობისა და სტატისტიკური ანგარიშგების ფორმების დამტკიცების შესახებ“ კომისიის 2016 წლის 11 თებერვლის N95/19 გადაწყვეტილების (ფორმა 4.15 სამაუწყებლო ბადე)  დარღვევის გამო.

2. გათავისუფლდეს შპს „ეკომი“ ადმინისტრაციული პასუხისმგებლობისაგან.

3. დაევალოს კომისიის აპარატის ადმინისტრაციას  (ო.ვოტ)  გადაწყვეტილების   შპს„ეკომისათვის“   დაუყოვნებლივ   გაგზავნა   და  კომისიის   ოფიციალურ   ვებგვერდზე (www.comcom.ge) გამოქვეყნება.

4. დაევალოს კომისიის აპარატის სამართლებრივ დეპარტამენტს (თ. კაველიძე) შპს „ეკომის“ სამართალდამრღვევად ცნობისა და ადმინისტრაციული პასუხისმგებლობისაგან გათავისუფლების თაობაზე მონაცემის კომისიის უწყებრივ რეესტრში შეტანა.

5. გადაწყვეტილება ძალაში შედის მისი დამოწმებული ასლის შპს „ეკომისათვის“ ჩაბარების დღიდან.

6. გადაწყვეტილება შეიძლება გასაჩივრდეს ქ. თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ. თბილისი, დავით აღმაშენებლის ხეივანი,  №64) შპს„ეკომისათვის“ გადაწყვეტილების  დამოწმებული  ასლის  ჩაბარების დღიდან ერთი თვის ვადაში.

7. კონტროლი გადაწყვეტილების შესრულებაზე (გარდა მე-3 და მე-4 პუნქტებისა) დაევალოს კომისიის                    აპარატის    აუდიო-ვიზუალური    მედია    მომსახურებების    რეგულირების დეპარტამენტს (ი.მახარაძე).

კახი ბექაური        თავმჯდომარე

ვახტანგ აბაშიძე    წევრი